Bimmuelta ni Nicholas Kaufman kenni sigud a Senador Antonio Trillanes IV kalpasan ti maysa a Facebook post a kaduana dagiti sumagmamano nga opisial ti International Criminal Court (ICC).
Sumagmamano nga aldaw kalpasan nga inbasura ti ICC iti kiddaw ni sigud a Presidente Rodrigo Duterte a temporario a mawaya-wayaan, nagpost ni Trillanes iti daan a retrato a kadua ti dua a saanen a nainaganan nga opisial ti ICC. Makita iti ladawan nga iggem ni Trillanes dagiti sumagmamano a dokumento.
Iti Facebook post ni Trillanes, mabasa iti kapsionna iti: “Salamat, ICC.”
Iti statement nga inruar ni Kaufman, imbilang na iti nagbalin nga aksion ni Trillanes kas maysa a nakakatkatawa a wagas tapno ipakita nga isu ket addaan ti dakkel nga impluwensia.
Inakusaran met ni Kaufman iti sigud a senador a gungundawayanna dagiti opisial ti ICC – a mangipakpakita ti political manipulation ken nagbalin a dalan tapno naan-anay a maiyakar ni sigud a Presidente Duterte idiay The Hague.
Impasigurado ti abogado a makaruar daytoy iti umno a panawen.
Kasaruno ti desision ti ICC idi Nobiembre 28 maipapan iti interim release ti sigud a presidente, kenuna ni Trillanes a saanen a rumbeng a pangnamnamaen dagiti lider ti kampo ti Duterte dagiti mangsupsuporta kadakuada.
Kenuna pay ti sigud a senador, saanen a maruk-atan ni Duterte kas bayad iti rinibu a Pilipino a maipagarup nga impapatayna.#
