BR LA UNION – Kontra ti kampo ni sigud a Presidente Rodrigo Duterte iti kiddaw ti prosekusyon iti International Criminal Court a ma-access dagiti personal nga arwatenna ken i-freeze ti anyaman a kuwarta a nakumpiskar kalpasan a naaresto ken naiturong idiay The Hague idi napalabas a tawen.
Segun iti depensa, saanen a kasapulan a ma-freeze ti kuwarta gaputa addan daytoy iti kustodiya ti ICC Registry.
Nupay kasta, no ipalubos ti pagukuman ti kadawatan, kiniddawda a saan a makissayan ti balor ti aniaman a nakompiskar a kuwarta.
Kiniddaw pay ti kampo ni Duterte a saan a palubosan ti prosekusyon a ma-access dagiti nakumpiskar a tulbek ken dadduma pay a personal nga arwaten gaputa mabalin a mailabsing daytoy ti privacy-na ken iti privacy rights dagiti kakabagianna.
Kabayatanna, iti biang ti ICC Registry, ket nakasagana a mangtungpal iti aniaman a bilin ti Trial Chamber III.
