ANGELES CITY – Kaskastrek laeng iti Clark International Airport idiay Angeles City, Pampanga ti maysa a pedophile a Norwegian ket dagus daytoy a pinagsubli ti Bureau of Immigration (BI) iti pagilianda.
Nabigbig ti nasao a gangganaet a ni Kim Vegar Kristofferson.
Segun kenni Atty. Ma. Antonnette Mangrobang, spokesperson ti BI, naggapu ni Kristofferson manipud idiay Oslo, Norway ken nagturong iti Pilipinas tapno bisitaen ti 16-anyos a boyfriend na idiay ili ti Concepcion, Tarlac.
Natiktikan ti Norwegian authority iti maipagarop a komunikasyon ti agnobyo ken iti transaksyon iti kuarta isu a nakikoordinarda iti BI iti Pilipinas.
Naamuan nga adda dagiti agtutuon nga kaso a panagmolestiya kadagiti menor de edad ti nasao a gangganaet idiay Norway.
Makunkuna nga iti social media nga agsapsapol ti biktima nga ubbing ti nadakamat a suspek.
