LA UNION – Dakkel a pukaw iti benneg ti New Poeple’s Army (NPA) iti pannakatay ti engkwentro dagiti dua a top leaders ti nasao a grupo dagiti rebelde a napasamak idiay Barangay San Manuel, syudad ti Tarlac idi Myerkules.
Iti pannakiuman ti Bombo Radyo La Union kenni Lt. Col. Isagani Nato, spokesperson ti Northern Luzon Command ti Armed Forces of the Philippines (AFP), kinunana a kimmapsot ti grupo nga idadaulwan dagiti NPA leaders nga isuda Victorio Tesorio alyas Dong, 1st Deputy Secretary ti Regional Operation Command ng Komiteng Rehiyon Hilagang-Silangang Luzon ken Lolito Raza alyas Lanlan, commander ti Danilo Ben Command.
Sigun kenni Col. Nato, gapu ti nasao nga insidente ket mangipaay daytoy iti dalan wenno rason kadagiti tauhan ti NPA iti Amianan a Luzon tapno sumuko dagitoy ken agsubli iti nakemda iti gobyerno.
Maipagarup nga addaan ti nasurok a 100 a tauhan dagiti dua a leaders idiay Cordillera Administrative Region ken idiay Cagayan Valley Region.
Immuna iti daytoy, napapatay iti tauhan ti Philippine National Police ken Philippine Army dagiti dua a nangato a mangidadaulo iti NPA idiay safe house-da idiay Tarlac City kalpasan a limmaban dagitoy.
Agisirbi koma dagiti pannakabagi ti linteg iti warrant of arrest kontra kadagiti NPA leaders gapu iti sangsanguen dagitoy a kaso a murder, frustrated murder, ken rebellion. (Absalom Flores)
