Inalerto ti Office of the Civil Defense (OCD) ti publiko kadagiti posible a napeggad nga epekto ti shear line ken intertropical convergence zone (ITCZ) a nakaigapuan ti nalabes a tudo iti adu a paset ti pagilian ken nakatayan ti lima a tattao.
Nangipaulog ni OCD Administrator Undersecretary Ariel Nepomuceno iti memorandum kadagiti amin a regional directors a mangibilin kadakuada nga i-activate da dagiti enhanced disaster response protocols ken siguraduen a nakasagana dagiti komunidad iti tengnga dagiti napagtipon nga epekto ti shear line ken ITCZ.
Kinunana, iti baet ti agtultuloy a naipadamag a layus a nagresulta iti pannakapukaw ti biag, pannakadadael ti sanikua iti nadumaduma a rehion, napateg ti panangaramid iti desidido nga addang tapno malapdan ti ad-adu pay a pannakapukaw ti biag ken perdisyon.
Impakdaar ti opisyal ti OCD a saan nga ikankano ti publiko ti epekto dagiti weather systems gapu ta mabalin a makadidigra dagitoy a kas kadagiti bagyo a nagduprak ditoy pagilian idi Enero 2023 nu sadiay 43 a biag ti napukaw idiay Visayas ken Mindanao gapu iti layus ken panagreggaay ti daga a gapuanan ti napigsa a tudo nga inyeg ti shear line.
Maibasar met iti kaudian a datos manipud iti OCD idi Enero 3, lima a tattao ti natay kadagiti agdama a weather systems, 20 a tattao ti nasugatan ken 2 a tattao ti mapukpukaw.
Nairekord dagiti natay idiay MIMAROPA, Eastern Visayas ken Davao region.
Mainaig iti daytoy, nasurok 139,000 a pamilia ti naapektaran idinto a nasurok met a 500 a pamilia ti nagturong kadagiti evacuation centers.
Kabayatanna, nasurok sangaribo a sangakabbalayan ti nadadael idiay Region 8 ken 11 ken nadadael met ti imprastruktura iti Region 11.
