Target iti Office of the Solicitor General a mangipila iti quo warranto petition kontra kenni suspended Bamban, Tarlac Mayor Alice Guo sakbay a malpas iti bulan ti Hulyo.
Inlawlawag ni Solicitor General Menardo Guevarra nga adda dan ita iti proseso iti panag-incorporate ken consolidation dagiti baro nga ebidensiya a natakuatan manipud idi imbestigasyon ti Senado mainaig iti ilegal nga operasyon ti Philippine Offshore Gaming Operators (POGOs) idiay Bamban.
Immunan a pinasingkedan ti OSG a mangipila da iti quo warranto case kontra kenni Guo iti kadarasan a panawen kalpasan a makumpirma ti National Bureau of Investigation nga agpada iti fingerprints ti suspendido a mayora ken ti Chinese passport holder a ni Guo Hua Ping.
Nangipila pay iti OSG iti petisyon tapno makanselar iti birth certificate ni Guo gapo iti saan na a pannakaipasa kadagiti legal requirements para iti late registration.
Kabayatanna, kinuna ni Comelec chairperson George Erwin Garcia a makatulong iti OSG iti agbalin a findings ti poll body iti panagbisita da idiay Bamban tapno alaen dagiti dokumentos para iti kaso ni Guo, pakairamanan ti election day computerized voters list a naglaon dagiti detalye dagiti botante a bimmutos kasta met dagiti fingerprints-da.
Inaramid ti dua nga opisyal iti statement iti maysa a press conference iti panagpinnirma iti memorandum of agreement iti baetan ti Commission on Elections, National Amnesty Commission, ken Presidential Task Force on Media Security idiay Palacio del Gobernador, Intramuros, Maynila.
