Naduktalan a natay ken maag-agnasen ti bangkay ti maysa a Pinay idiay Kuwait a dua nga bulanen a naipadamag a mapukpukaw. Nabigbig daitoy a ni Dafnie Nacalaban.
Segun kenni Migrant Workers Secretary Hans Leo Cacdac, ti pimmusay ket lima tawenen nga OFW idiay Kuwait
Kinuna met ti employer na nga idi pay kano Oktubre a pimmanaw ni Dafnie nu sadino ket maudi metten a gundaway a nakasarita na dagiti kakabagianna.
Immunan a naipadamag nga adda iti natakuatan a bangkay ti maysa a Pinay worker iti arubayan ti amo na idi Disyembre 31, 2024.
Daitoy ket kalpasan a maiturn-over kadagiti otoridad ti suspek babaen ti panangisurrender kenkuana ti mismo a kabsat na.
Dita metten a nadiskubre ti bagi iti OFW ken ti agdama ket addan iti kustodiya ti Kuwait iti suspek , nga addaan iti immun-unan a criminal record.
Inbinglay ti kabsat ni Dafnie a plano kuman ti kabsat na ti agawid ditoy Pilipinas idi Disyembre ngem napasamak metten iti krimen.
Segun kenni Cacdac, saan pay a nalawag iti agdama nu anya ti relasyon ti naarestar a prime suspect iti biktima nga OFW ken awan met iti timeline nu katno daitoy a napapatay.
Iti laksid daitoy ket addaanen ti abogado a nakatutok iti kaso ken makikokoordinar da metten iti Kuwaiti prosecution tapno maasikason ti pannakatay ti Pinay worker nu kasta ket magun-od ti hustisya.
Maipalagip nga idi napalpalabas a tawen ket sumagmamano nga OFWs iti napapatay idiay Kuwait: karaman ditoyen ti brutal a pannakatay ni Jullebee Ranara, a nirames ti anak ti amo na ken pinuoran na pay idi naibelleng nan iti disyerto. Nakita ti bangkay na idi Enero 21, 2023.
