Mabalinen nga ipulong dagiti agraraira nga online shopping scam ita a panawen ti bakasion babaen ti eReport feature ti eGov Super App.
Iti maysa a statement, kinuna ni Department of Information and Communications Technology (DICT) Undersecretary David Almirol a ti kabarbaro a feature ket ti e-commerce reporting para iti proteksion dagiti consumers babaen ti Department of Trade and Industry (DTI).
Makuna a ti DTI Consumer Protection Office ti umawat kadagiti real-time report ken dagus nga agtignay kadagitoy.
Ti baro nga e-Report feature ket mangpasayaat iti proseso ti panangireport kadagiti scam numbers babaen ti panangala iti screenshot ti mapagduaduaan a text message agraman ti numero ti nangipatulod a mabalin nga isubmitir ti user iti gobierno babaen ti eGov App.
Mainaig iti daytoy, indagadag ti DICT iti publiko nga usarenda ti e-Report ken eTravel features ti eGov Super App iti baet ti manamnama nga iyaadu dagiti krimen ita a Christmas holiday.
