LA UNION – Rinugyanen iti La Union Police Provincial (LUPPO) ti panangipatungpal iti Oplan Tokhang iti inetro a probinsya ti La Union.
Iti pannakiuman ti Bombo Radyo La Union ken C/Ins. Silverio Ordinado, spokesperson ti LUPPO, kinunana nga adda iti pakabuklan a 238 drug personalities ti kasapulan a na-tokhang idiay probinsya.
Iti nasao a bilang, mangiyun-una ti Agoo nga addaan ti 121 drug personalities a kasapulan a bisitaen iti pulis wenno dagiti nabirngasan a “tokhangers”; maikaddua iti ili ti Aringay, 21; maikatlo iti ili ti Bauang ken syudad ti San Fernando nga addaan ti sag-18 bilang ti drug personalities; 16 idiay ili ti Sto. Tomas; addaan met iti 11 idiay ili ti Rosario ken ti dadduma pay nga ili.
Sigun kenni Ordinado, ikagumaanda a lippasen ti Oplan Tokhang wenno bisitaen dagiti drug personalities iti uneg laeng ti makalawas kaddua iti dadduma pay a sektor a tumultulong iti kampanya kontra ti droga.
Bin-ig a validated kunana ti Provincial Intellegence Branch ken ti intelligence community dagiti adda ti listaan dagiti ma-tokhang a pakairamanan dagiti sumagmamano a municipal ken barangay officials.
Impanamnama met ti pulisya a saan a malabsing iti karbengan dagiti drug personalities a kasaritada ken irespetoda iti pangngeddeng dagitoy no saanda a kayat ti sumuko.
Innayon pay ni Ordinado, nga ilibak man dagiti tattao nga adda iti nasao a listaan nga isuda ket saan a karaman iti panangitandudo iti droga ket mangaramid latta ti wagas iti pulisya tapno isardeng iti iligal nga aramid dagitoy.
