BR LA UNION – Boluntaryo nga insuko ti maysa a concerned local citizen ken dua a mangngalap kadagiti otoridad iti ₱20,400,000.00 a gatad ti shabu (methamphetamine hydrochloride) a nasarakan a naiyanud iti igid ti kabaybayan idiay Ilocos Norte.
Ti shabu, a nakaikabil iti tallo a plastic bag nga addan ti Chinese character markings, ket mapatta-patta nga agdagsen ti pakabuklan a tallo a kilo.
Nasarakan dagitoy a tumtumpaw iti igid ti kabaybayan kadagiti sumaganad a barangay idiay Ilocos Norte:
-Barangay Pangil, Currimao
-Barangay 33-A, La Paz, Laoag City
-Barangay Masintoc, Paoay
Naisuko dagiti nasao a pakete ti shabu iti Philippine Drug Enforcement Agency (PDEA) – Ilocos Norte Provincial Office, kadwa da iti local counterparts dagitoy manipud iti Philippine Coast Guard (PCG) ken Philippine National Police (PNP) idi Hunyo 12 ken 13, 2025.
Segun kenni PDEA Director General Isagani R. Nerez, agtultuloy ti retrieval operations ken panangbantay kadagiti coastal areas agingga a naan-anay a ma-inspeksiyon ti amin a lugar iti aglawlaw.
