Nakatudingen nga ilako ti Department of Agriculture (DA), kabinnulig ti Department of Migrant Workers (DMW) iti P20 per kilo a bigas kadagiti Overseas Filipino Worker (OFW) ken kadagiti pamilya da iti Kadiwa ng Pangulo sadiay DMW central office, Mandaluyong City.
Segun kenni DMW Secretary Hans Leo Cacdac, panggep da a maaddaan ti access dagiti OFWs ken kadagiti pamilya da iti abot-kaya a presyo ti bigas a marikrikna metten ti sapasap a komunidad.
Ti DMW ken DA ket nagbinnulig pay ti panangpartuat ti komprehensibo a suporta ken tulong teknikal kadagiti prospective nga OFWs nga “agri-preneurs” kas paset ti entrepreneurship development initiatives babaen ti national reintegration program.
Innayon pay ni Cacdac a ti sektor ti agrikultura ket maysa a naisangsangayan a gundaway iti panagnegosyo ken panagpuonan para kadagiti OFW.
Dagiti agpada nga ahensya ket nakapamaysa iti panangitandudo ti agri-business kas maysa a sustainable ken pagbiagan a programa para ti panagkakadwa manen dagiti OFWs.
