LA UNION – Umabot iti P250,000 ti balor iti jewelry ken cash ti Indian national ken ti asawa daytoy a Filipina iti intaray dagiti holdaper idiay Barangay Cabarsican, ili ti Bacnotan, La Union.
Nabigbig dagiti biktima a ni Jaswinder Singh Chauhan, 57 ken Arcadia Abarraloso, 58, residente ti Barangay Dalumpinas Oeste, syudad ti San Fernando, La Union.
Iti pannakiuman ti Bombo Radyo kenni C/Ins. Reynaldo Soria, hepe ti Bacnotan Police Station, kinunana a maipagarup nga insardeng dagiti biktima ti naglugananda a kotse nga asideg iti maysa a tarsena tapno agkolekta ti kwarta ti mister idi nga immasedeg dagiti uppat a suspek a nakabonete ken agkakalubbon iti dua a motorsiklo kasaruno iti panangipasarang ti paltog.
Pinilit nga innala dagiti suspek ti P50,000 a kwarta iti agassawa ken ti naduma-duma a kita iti alahas nga agbalor iti P210,000, karaman iti dadduma pay a kagawaan dagitoy.
Napartak a naglibas dagiti suspek kalpasan a maipatungpalda ti krimen.
Iti agdama,agtultuloy pay laeng ti imbestigasyon ti pulisya tapno maammuan iti pakabigbigan dagiti suspek. (Absalom Flores)
