Papaimbestigaran ni House Assistant Majority Leader ken Ako Bicol Party-list Representative Raul Angelo “Jil” Bongalon ti P700B reserve fund ken P500B investible fund ti Philippine Health Insurance Corporation wenno Philhealth.
Kasaruno daitoy ti desisyon ti Kongreso nga ikkaten iti 2025 national budget ti P74B premium subsidies ti Philhealth.
Impaganetget ni Bongalon, kasapulan nga imbestigaran nu kasatno a nausar ti pondo ti Philhealth iti baet ti pannakapaay daitoy a palaen ti benepisyo wenno ibaba ti babaydan a premium kadagiti miyembro uray pay dakkel ti iggem daitoy a pondo.
Dinakamat pay ni Bongalon nga ado nga ospital ken doktor ti agrekreklamo agsipud ta saan da a dagos a mabaybayadan ti Philhealth ken interesado pay isuna a maamwan nu sino ti agnumnumar ti binilyon a piso a gatad ti investment ti Philhealth.
