LA UNION – Isagsaganan dagiti pannakabagi ti linteg ti kaso kontra iti marijuana cultivator a mangay-aywan iti dua a marijuana plantation idiay Barangay Sapdaan, ili ti Santol, La Union.
Nabigbig ti suspek a ni Jerry Dionisio, 37, residente ti nasao a lugar.
Naammuan ti Bombo Radyo manipud iti La Union Police Provincial Office ken Philippine Drug Enforcment Agency (PDEA) Regional Office-1, naaktuanda ti suspek iti nadakamat a pagmulmulaan ti marijuna a makumikom a mangay-aywan kadagiti mula.
Dagus a pinarot ken inuram iti tauhan ti pulisya ken PDEA dagiti naimula a marijuana a mapatta-patta nga agbalor ti P720,000.
Nakabaluden ita idiay Santol Police Station ti suspek.
Dukduktalen pay laeng iti pannakabagi ti linteg no adda iti kakaddua ti suspek a mangay-aywan ti nasao a marijuana plantation. (Absalom Flores)
