LA UNION – Mangisay-sayangkat iti naun-uneg pay nga imbestigasyon dagiti otoridad iti napasamak a panagtakaw iti uneg ti opisina ti Red Logo Lifestyle Inc. a nakabase iti Barangay One, San Fernando City, La Union.
Naamwan nga umabot iti aganay P96,500 a collection and sales ti nasao a kompanya a nakaidulin iti vault, iti mapukpukaw.
Immuna ti daytoy, nadiskubre iti dua nga empleyado nga isuda Rosario Herrera, center manager, 39, residente ti Barangay Baccuit Norte, Bauang, La Union ken ni Richelle Lubi, 27, operation supervisor, residente ti Barangay Parian ditoy met laeng syudad, a mapukpukaw ti nasao a kantidad ti kuwarta idi lukatan da ti vault, agarop alas 11:00 ti agsapa idi kalman.
Dagus met a nagreport dagitoy iti pulisiya ket agpar-parang iti inisyal nga imbestigasyon dagiti otoridad nga awan ti force entry iti nasao nga opisina.
Maibasar met iti naala a CCTV footage iti nasao a pasdek, maysa nga empleyado, managan Rosemegi Pichayco, 22, supervisor iti Red Logo ken residente ti ili a San Juan iti nakita a simrek iti opisina da kadwa na iti nobyo daytoy, managan Darren Macagba, 24, taga Barangay Camansi ditoy syudad, ken maipagarop nga empleyado ti SSS Vigan branch.
Base pay iti CCTV footage, namitlo a daras a simrek dagiti dua iti nasao nga opisina idi rabii ti Sabado.
Ngem idi rabii ti Domingo, agarop alas 9:09, maysa nga unidentified a lalaki a nakasuot iti jacket with hood, naka-shorts ken rubber shoes iti nakita a simrek iti nasao met nga establisimento ken rimwar iti oras ti alas 9:30 ti rabii.
Kabayatanna, inimbitaran metten ti pulisiya dagiti nasao nga agnobyo iti police station, ngem pinaglibakan ti lalaki nga adda pakainaigan na iti nasao nga insidente.
Iti Red Logo ket direkta nga agilaklako kadagiti quality fashion and lifestyle products.
