BR LA UNION – Maipagarop nga umabot iti P1 billion ti kuwarta a naitulod iti penthouse ni Ako Bicol Rep. Elizaldy Co idiay Shangri-La Hotel, Taguig.
Daytoy ti nadagsen nga alegasyon nga inbutaktak ti dua a sigud a district engineer ti Department of Public Works and Highways iti panagdengngeg ti Senate Blue Ribbon Committee ita nga aldaw ti Martes, Setyembre 23.
Segun kenni Brice Hernandez, sigud a Bulacan 1st District Engineer, maipagarop a nasurok 20 a maleta ti kuwarta a nailugan iti innem agingga pito a van ti nagturong iti penthouse ti kongresista, ken naiyawat kunana iti maysa a tao a managan ti “Paul”, a maipagarop nga aide ni Co.
Kinuna ni Hernandez a saan a direkta a nakisinnarak kenni Co, ngem maipagarop a nakita na daytoy bayat a kasar-sarita ti sigud a boss na a ni dati a DPWH-Bulacan district engineer Henry Alcantara.
Mainaig ti daytoy, kinumpirma met ni Jaypee Mendoza, sigud nga assistant engineer, dagiti detalye ti panagitulod ti kuwarta.
Kinuna na a dagiti immun-una a tawen ket idiay Shangri-La Hotel a maisay-sayangkat dagiti transaksyon, ngem iti simmar-saruno a tawen ket naiyakar idiay Valle Verde 6, a maipagarop a pagtaengan ti kongresista idiay Pasig.
Maipalagip a ni Rep. Co ket sigud a chair ti House appropriations committee, ken kabilang kadagiti mammanday linteg a maim-imbestigaran seknan ti anomalya iti flood control projects ti DPWH.
