Kinontra ti Department of Labor and Employment (DOLE) ti report a pakairamanan ti Pilipinas nga ‘kulelat’ nu maipapan ti work/life balance dagiti mangmangged.
Segun kenni Labor Secretary Bienvenido Laguesma, saan da nga ammo iti wagas nga inaramid ti Remote iti Global Life-Work Balance Index 2024 nu sadino maika-59 iti Pilipinas manipud kadagiti 60 a pagilian nga addaan nangato a gross domestic product wenno GDP.
Nu maibasar iti matrix nga inusar da ket agkurang daitoy gapo adu iti pagbasaran a nalamlamang pay iti Pilipinas.
Intudo ti sekretaryo ti sumagmamano a nagbasaran iti report kas kadagiti suweldo, healthcare system ken dagiti paid leave.
Kinuna ni Laguesma, addaan tayo iti agraraira nga universal healthcare system, ad-adu nga maternity leaves a dumanon iti 105 nga aldaw nu idasig iti possible a pinagbasaran da a 60 nga aldaw laeng, ken nadumaduma pay a benepisyo kas iti SSS ken GSIS sick leave benefits.
Maipapan met iti isyu ti ababa a pasuweldo, kinuwestiyon ni Laguesma nu apay nga adda dagiti pagilian a nangatngato pay iti ranking da ngem ti Pilipinas idinto a nababbaba met ti score da nu suweldo ti pagsasaritaan.
Immunan a pinasingkedan ti labor leader a ni Ka Leody de Guzman a nababa ti work/life balance iti Pilipinas agsipud ta adu ti mapilpilitan nga ag-overtime kabayatan iti nababa lang garuden a pasuweldo ti pagilian.
