Binilin ni Agriculture Secretary Francisco Laurel Jr. ti Philippine Crop Insurance Corporation (PCIC) a papartaken ti panagproseso kadagiti claims kasta met a mangipaay kadagiti mabalin a tulong para kadagiti mannalon a makasubbot manipud iti pannakalugi a gapo kadagiti didigra.
Inlawlawag ni Secretary Laurel, sungbat daitoy ti ahensya iti direktiba ni Presidente Ferdinand “Bongbong” Marcos Jr. a tuloy-tuloy a panagtulong kadagiti biktima ti dua a kallabes nga bagyo.
Basar iti patta-patta ti Philippine Crop Insurance Corporation, dumanonen ti agingga P666.7-M iti indemnification kadagiti mannalon a naapektaran kenni Bagyong Kristine laeng.
Segun iti Department of Agriculture, ti nagtipon a kantidad ket para kadagiti nasurok 86,000 a mannalon manipud Central Luzon, Bicol Region, ken MIMAROPA.
Innayon pay ti sekretaryo a dagiti manamnama nga indemnifications ket P413.6-M para iti palay, P167.9-M para kadagiti high value crops, ken P27.7-M para kadagiti fisheries.
Iti kaudian a report ti DA, dummanonen iti agarop P5-B ti perdisyon ti sektor ti agrikultura ken fisheries manipud iti sangapulo a rehion ditoy Pilipinas.
