BR LA UNION – Winaswas ti Korte iti panagserbi a mayor ni Alice Guo idiay Bamban, Tarlac kalpasan a nangiruar ti desisyon ni Judge Liwliwa S. Hidalgo idi Hunyo 27, 2025.
Pinaburan ti Manila Regional Trial Court (RTC) Branch 34 iti quo warranto petition ti Office of the Solicitor General (OSG) kontra kenni Guo, agsipudta awan dudua a maysa isuna a Chinese agsipudta agpada nga intsik iti Ama ken Ina na.
Kayatna sawen a ‘void’ wenno awan ti bileg sipud idi nagtugaw a mayor ni Guo. Napaneknekan pay iti Korte a ni Alice Guo ken iti Chinese citizen a ni Guo Hua Ping ket maymaysa a tao maibasar ti agpada a finger prints.
Kabayatanna, pinaglibakan ti legal team ni Guo iti nagbalin nga imbestigasyon ti National Bureau of Investigation ken iti akusasyon nga impasngay ti nagannak a Tsino ni Guo.
Impaganetget pay ti korte a ti Philippine passport ni Guo ken iti birth certificate na ket saan nga umanay nga ebidensya tapno paneknekan a Pilipino daytoy.
Maibasar pay iti desisyon, saan a mailibak a chinese ni Guo ken iti nagannak na a simmangpet ditoy Pilipinas manipud Fujian, China, idi Hulyo 12, 1999.
Iti desisyon ti korte ket mangipaneknek a saan laeng a diskwalipikado para iti posisyon kas mayor, ngem ketdi saan pay a mabalin a tumaray para iti nasao a posisyon.
Dinakamat pay ti korte a saan a nagbaliw iti diskwalipikasyon nga uray nabotosan ken pormal a nagsapata iti posisyon. Ibagbaga pay ti desisyon a ti proklamasyon ket awan bileg na sipud nag-file ti Certificate of Candidacy.
Maipalagip nga idi August 2024, binilin ti Office of the Ombudsman iti dismissal ni Gou kalpasan a mairaman iti Philippine Offshore Gaming Operators (POGO).
