Kinontra ni Senador Francis “Kiko” Pangilinan iti singasing ni Senador Robinhood Padilla nga ibaba iti 10-anyos iti edad ti criminal liability para kadagiti agtutubo a karaman kadagiti heinous crimes.
Para kenni Pangilinan, saan a solusyon iti panag-amyendar iti Juvenile Justice and Welfare Act wenno Republic Act 9344 no di ket iti nainget nga implementasyon daytoy.
Pinaboran met ni Senador Raffy Tulfo iti singasing ni Padilla maibasar kadagiti kaso a maaw-awat ti programa na iti radyo a karaman dagiti menor de edad kadagiti nadumaduma a krimen.
Segun kenni Tulfo, panawenen tapno maadal no epektibo pay laeng iti agdama a linteg kontra iti panagngato dagiti kaso nga iti involved ket dagiti agtutubo, kasta met iti panangipaay iti naan-anay a pondo para iti Department of Social Welfare and Development (DSWD) tapno makaipasdek ti kanayunan a pasilidad para kadagiti ubbing a naglabsing iti linteg.###
