BR LA UNION – Uppat ti natay ken dua ti nasugatan iti panaglalaban ti dua a pamilya idiay San Isidro, La Paz, Iloilo City.
Natay iti bagsol da Johnny Provido Sr., 68, maysa a retired army, ken dagiti annak na, isuda: Johnny Provido Jr., 44, ken Joven Provido, 46.
Natay met ni Tyrone Muya, 33, bayat a dagiti dua a kabsat na a nagsagaba ti pannakasugat ket maag-agasan iti ospital.
Maibasar iti imbestigasyon ti Iloilo City Police Office, maipagarop a nagturong ti pamilya Provido iti balay ti pamilya Muya gaputi saan a natuloy a transaksyon iti ilegal a droga.
Kalpasan ti nabara a panagsisinnungbat, nagbanag iti binnagsol a nakatayan dagiti uppat a biktima.
Iti interview ti Bombo Radyo kenni Barangay Chairman Felicitas Hortillosa, kinumpirma na a ni Tyrone Muya ket sigud a tokhang surrenderer ken naipasidong iti drug rehabilitation.
Kabayatanna, inaklon ti ina dagiti natay nga agkabsat a Provido nga agus-usar ti ilegal a droga ti anak na ken ka-transaksyon na ti alyas “Badoy,” a live-in partner ti kabsat a babae ni Muya.
Segun kadagiti otoridad, saan a nai-deliver ti ilegal a droga idinto a nabayadanen daytoy ni Johnny Jr., a mapapati a ramot ti nakaam-ames nga insidente.
Agtultuloy iti imbestigasyon ti pulisya tapno madetermina ti dadduma pay a karaman iti krimen.
