BR LA UNION – Kritikal pay laeng iti kasasaad ti dua nga estudyante a karaman kadagiti 15 a nasugatan iti napasamak a pammaltog iti uneg ti San Jose National High School idi Lunes, Hunyo 22.
Nabigbig dagiti biktima nga isuda Joan Vinias, maysa a Grade 10 student a nagsagaba ti tama ti bala iti ulo, ken Nathan Candelario, Grade 9 student a nasugatan iti tiyan kalpasan a mapaltugan.
Segun iti ina a ni Rowena Eracho, saan a nasayaat ti marikrikna ti anak na idi agsapa ti Lunes ket gestay saan a simrek iti pagadalan, ngem impilit na ti sumrek isunga pinalubosanna daytoy.
Kalpasan ti sumagmamano nga oras, nadamaag laengen ti ina iti napasamak a pammaltog iti pagadalan.
Napalalo iti ledda-ang ita ni Rowena agsipudta saanna a maawat iti nagbanagan ti anak na.
Salodsod na nu kasatnu a nakastrek iti pagadalan dagiti menor de edad a suspek a nakaimet ti paltog.
Kiddaw na a makalasat ti anak na nga addaan ti arapa-ap nga agbalin a nurse.
Kabayatanna, kritikal met iti kondisyon ni Nathan Candelario, maysa a Grade 9 student. Segun iti ama na a ni Erwin, timmama ti bala iti baba ti puseg na ken limsut iti bakrang na. Tallo nga abut iti bituka isunga posible a nabayag ti panagimbag ti barito.
Iti pakabuklan, 15 nga estudyante dagiti nasugatan bayat a tallo ti natay iti insidente.
Segun iti pulisya, agtawen ti 14 ken 15 dagiti suspek nga agtaltalinaed iti kustodiya dagiti otoridad.
Naidatag metten iti kaso a murder ken frustrated murder kontra iti 15-anyos a suspek kalpasan a nadetermina nga ammo na ti inaramid na a krimen.
Agtultuloy nga agpanpanawagan ti hustisya iti pamilya dagiti biktima ken kiddaw da a mapagsungbat amin nga adda pakainaigan na iti nakaam-ames a krimen.
