BR LA UNION – Natay ti maysa a karpintero kalpasan a pinaltugan ti saan a nabigbig a suspek a naka-abungot idiay Purok 5 Brgy. Butubut Norte, Balaoan, La Union agarop alas 4:55 ti malem idi Oktubre 9, 2025.
Iti biktima ket taga Brgy. Ar-arampang, Balaoan, La Union, agtawen ti 37, ken adda asawa na.
Maibasar iti inbestigasyon, ti biktima ket dagiti kakadwa na ket nagi-inom iti maysa a balay idi kellaat a simmangpet ti dua a maipagarop a saan da nga am-ammo a lallaki ket nagdamag nu siasino kadakuada ti agnagan “Marco”.
Kalpasan a simmungbat ti biktima, maipagarop a dagus a pinaltugan isuna ti maysa a suspek babaen ti mapapati a kalibre 45 a paltog.
Maibasar iti inisyal nga inbestigasyon, nagsagaba ti biktima iti innem a tama ti paltog a puon ti dagus a nakatayan daytoy.
Dagus a naglibas dagiti dua a saan pay a nabigbig a suspek, a nagturong iti nagduma a direksiyon.
Agtultuloy iti isay-sayangkat a panangsukimat dagiti otoridad iti kinasiasino dagiti suspek ken motibo ti nasao a krimen.
