BR LA UNION – Nainget a kinondena ti August Twenty-One Movement (ATOM) iti desisyon ti Sandiganbayan nga ibasura iti nabatbati nga asset claims ken ti maipagarop a “panagsuko” ti Presidential Commission on Good Government (PCGG) iti forfeiture case kontra iti pamilya Marcos.
Daytoy ket kalpasan nga inwaragawag ti PCGG a saan a mangidatag ti kanayunan nga ebidensya iti Civil Case No. 0141.
Segun iti ATOM, arigna simmuko ti ahensya iti pagrebbengan na a masubbot iti maipagarop a takaw a kinabaknang dagiti Marcos.
Impaganetget ti grupo a saan a rumbeng a maipaigid dagiti kaso kontra iti pamilya Marcos ken inawagan da a mapagdudua-an iti tayming ti nasao a desisyon.
Linagip da pay ti pangngeddeng idi 2018 kontra kenni sigud a First Lady Imelda Marcos iti pito a bilang ti graft nga agingga ita ket saan pay a naipatungpal.
Mainaig ti daytoy, inallokoy ti ATOM iti publiko nga ituloy ti panawagan nga adda sungsungbatan iti pamilya Marcos ken Romualdez, ken impaganetget da a ti isyu ket maipapan iti hustisiya ken pananglapped ti kultura ti impunity ditoy pagilian.
Iti ATOM ket maysa a grupo a nabuangay kalpasan ti pammapatay idi kenni sigud a Senador Benigno “Ninoy” Aquino Jr. idi 1983 tapno ilungalong ti demokrasya ken kontraen ti diktadurya ni sigud a Presidente Ferdinand Marcos Sr.
