Namnamaen ti Department of Agriculture a maawatdan ti resolusion manipud iti National Price Coordinating Council para iti pannakaideklara ti ‘food security emergency for rice’.
Iti press conference iti opisina ti ahensia, pinasingkedan ni Assistant Secretary for Special Concerns and for Official Development Assistance ken Spokesperson Engineer Arnel De Mesa a saan pay a naited ti kastoy a resolusion iti departamentoda.
Kinunana nga apaman maawatda dagiti mainaig a dokumento ket mairugin nga dagus ti panagrepaso tapno inton Miyerkules, Enero 22, mangipaulogen ni Agriculture Secretary Francisco Tiu Laurel Junior iti desision.
Inpetteng ni De Mesa a dida ammo no apay nga adda panagtaktak iti biang ti National Price Coordinating Council (NPCC) ngem ammoda met a naaprobaranen ti ahensiada ti kastoy a resolusion.
Kinunana nga ur-urayen laeng ti departamentoda ti kopia dagiti mainaig a dokumento tapno matingiting a naimbag ken no maamwan nu kasapulan metlaeng aya ti deklarasion wenno saan.
Kabayatanna, nangrugin idi kalman ti designation ti maximum suggested retail price nga P58/kilo para iti imported rice kadagiti merkado.
