Inwaragawag ni Interior Secretary Jonvic Remulla a mabalin a dumanon ti maysa agingga iti tallo a lawas sakbay a maisubli ditoy Pilipinas ti sigud nga Ako Bicol-Party List Rep. Elizaldy “Zaldy” Co manipud iti pagilian a Czech Republic.
Natiliw ni Co idiay Prague kalpasan a maipagarup a natiliwan nga awan ti umno a travel documents bayat ti panangpadasna a bumallasiw idiay Germany. Segun iti report, pinasubli isuna dagiti Czech authorities ken agdama a maur-urnos iti proseso ti deportationna.
Innayon pay ni Remulla a nakadependir iti kapartak ti panagawidna iti koordinasion ti Department of Foreign Affairs ken dagiti autoridad iti Czech Republic. Adda met dagiti komplikasion gapu ta kanselado ti Philippine passport ti sigud a mammanday-linteg.
Segun kadagiti opisyal, nakaapan metten ni Co iti nadumaduma a pagilian idiay Europa sakbay a naarestar, ken posible a limmasat pay idiay France sakbay a simmangpet iti Czech Republic.
Sumangsango ni Co kadagiti kaso a graft ken malversation mainaig iti mapapati nga iregularidad iti ₱289.5 million flood control project idiay Oriental Mindoro. Maibilang pay daytoy a “fugitive from justice” ti Sandiganbayan kalpasan a nagkedked nga agsubli ditoy Pilipinas tapno sumango kadagiti kaso.
Apaman a makaawid, maipan isuna iti Sandiganbayan para iti arraignment ken posible a maibalud sadiay Camp Crame bayat a madengdengeg ti kasona.
Kabayatanna, kenuna ti Malacañang a nakasagana ni Presidente Ferdinand Marcos Jr. iti aniaman nga agbalin nga statement ni Co ken impaganetget a rumbeng nga agsungbat dagiti karaman iti flood control corruption scandal.###
