Saan nga isyu iti saritaan ti hurisdiksion ti Senate impeachment court maipanggep iti impeachment case kontra kenni Bise Presidente Sara Duterte.
Daytoy iti nagbalin nga reaksion ni Senate Deputy Minority Leader Risa Hontiveros iti plano a mosyon ni Senador Ronald “Bato” dela Rosa tapno kwestionaran iti hurisdiksion ti 20th Congress iti impeachment case maibusor iti Bise.
Segun iti Senadora, natalantanen iti hurisdiksion idi pay napalabas a 19th Congress isu ta awanen ti rumbeng a pagsaritaan seknan iti nasao a banag, ngem no adda ti senator-judge nga agmosyon ket nakasagana isuna nga idebate daytoy.
Saan met a pabor ni Hontiveros iti panggep nga aramiden ni dela Rosa a damagen iti Senate 20th Congress no kayat da nga ituloy iti impeachment trial kontra kenni Duterte, agsipudta bilin ti Konstitusyon nga usigen iti akusado.
Kabayatanna, namnamaen met ti manmanday-linteg nga maaddaan ti nalawa a diskusyon wenno debate iti oras a marugyanen iti panagusig kenni Bise Presidente Sara Duterte. #
