Impaganetget ti maysa nga agserserbi a senador-judge iti impeachment trial ni Bise Presidente Sara Duterte, a ni Senador Panfilo Lacson, a saan a trabaho ti Senate impeachment court a lukatan iti naselyuan a Bureau of Internal Revenue (BIR) box.
Imbes ketdi, imbagana a rumbeng nga agkiddaw ti House prosecution panel iti pammalubos manipud iti Office of the President no kayatda a lukatan ti BIR box.
Kinunana nga immanamong dagiti senador bayat ti caucus-da idi napan a Biyernes nga isubli dagiti naselyuan a BIR box iti House prosecution, gaputa awan ti karbengan ti korte nga ilemmeng wenno agbalin kas “gatekeeper” para kadagiti ebidensiy a saan pay a pormal a naiparang iti panagusig.
Impaganetget ni Lacson nga iti sidong ti Section 71 ti Tax Code, dagiti tax record ket confidential ken mabalin laeng a mairuar wenno malukatan babaen ti naisurat a pammalubos manipud iti Presidente—iti rekomendasyon ti Bureau of Internal Revenue ken ti Department of Finance—wenno babaen ti waiver manipud iti respondent.
Nagballaag pay ni Lacson a no ipilit ti Senate impeachment court a luktan ti kahon nga awan ti umno a legal nga awtorisasyon, agpeggad ti Senado a makaswan ti “grave abuse of discretion”.
Segun kenni Lacson, saan a rumbeng nga ipasa ti prosekusyon iti Senado iti pananglukat ti nasao a kahon.
Rumbeng kunana nga iti House of Representatives pay laeng ket kiniddaw dan iti pammalubos manipud Malacañang sakbay nga impatulodda idiay Senado.
Iti selyado a kahon ket naglaon iti tax records da VP Sara Duterte ken ti asawana a ni Mans Carpio, nga insubmitir ti BIR iti House Justice Committee.
Impasa daytoy ti Kamara idiay Senado a saan a nalukatan.
Kayat ti House prosecution panel a luktan daytoy tapno mausar kas ebidensia para iti Article II ti Articles of Impeachment, nga adda pakainaiganna iti maipagarup a “saan a mailawlawag a kinabaknang” ti Bise Presidente.
