BR LA UNION – Maimatangan iti sumaruno a panagdengngeg ti House Committee on Justice iti linaun ti income tax returns da Vice President Sara Duterte ken asawa na a ni Atty. Manases Carpio, kalpasan a kumpirmaren ti komite a naisumite daytoyen iti Bureau of Internal Revenue.
Sgeun kenni Justice Committee Chairperson Rep. Gerville Luistro, awanen ti serbi na wenno moot iti petisyon nga indatag ni Carpio idiay Quezon City Regional Trial Court idi Abril 13, nga addaan panggep a lapdan iti komite a makaala ken isapubliko ti ITR da nga agassawa.
Maipalagip nga inreklamo ni Carpio ti inruar a subpoena ti komite kontra kenni BIR Commissioner Charlie Mendoza a mangimandar nga agsumite iti dokumento iti buwis dagiti agassawa ken iti negosyo dagitoy.
Imapaganetget da a panaglabsing daytoy iti Data Privacy Act ken exceedingly overstretched, nangruna ket nangrugi laeng iti termino ni Duterte idi Hunyo 30, 2022.
Pormal a maiprisinta ti nasao nga ITR iti panagdengngeg ti komite inton bigat, Abril 22.
Namnamaen ni Luistro a matalantan kadwa ti BIR dagiti limitasyon maipapan iti confidentiality dagiti nasao a dokumento.
Kabayatanna, inlawlawag ti mammanday linteg a dagiti laeng reports manipud Anti-Money Laundering Council (AMLC) iti paayaban ti komite para iti nakatuding a panagdengngeg inton bigat seknan iti alegasyon ti unexplained wealth kontra iti Bise Presidente.
Sakopen ti nakiddaw a dokumento iti covered transactions wenno iti kantidad nga umabot iti P500,000 agpangato, agraman iti suspicious transactions nga obligado nga ireport dagiti bangko iti konseho anyaman ti balor dagitoy.
