LA UNION – Ur-urayen ti pulisya iti pangngeddeng ti pamilya ti biktima no mangidatag dagitoy iti kaso kontra ti respondent driver a karaman iti karambola dagiti innem a lugan idiay Diversion road a masakupan iti Barangay Biday, syudad ti San Fernando, La Union.
Iti pannakiuman ti Bombo Radyo kenni S/Ins. Anthonio Marzan, spokesperson ti San Fernando City Police Office, kinunana nga agtalinaed iti opisinada ti respondent driver a nagmaneho ti trailer truck nga isu ti makagapu iti aksidente a nagbanag ti pannakatay ti biktima nga agmanmaneho ti motorsiklo a ni Jheson Estilong, 21, maysa nga agricultural student ti DMMMSU-NLUC a nakabase idiay ili ti Bacnotan, La Union.
Ngem no saanda a mauray ti pamilya iti biktima a mangidatag iti kaso ket ruk-atanda ti respendent driver no madanum ti reglementary period.
Kabayatanna, immanamong met dagiti lima pay a nangmaneho iti lugan a maki-areglo ti respondent driver para iti pannakatarimaan dagiti nadadael a behikulo.
Immuna iti daytoy, maipagarup a napartak iti panagmaneho ti nasao a driver ti trailer truck nagbanag iti karamabola dagiti nasao a lugan ken nakatayan ti nasao nga estudyante ken nakasugatan iti lima pay a tattao. (Absalom Flores)
