BR LA UNION – Nadismaya ti Public Attorney’s Office iti desisyon ti Department of Justice a was-wasen iti kaso nga immuna a naipila kontra ken ni sigud a Health Secretary Janette Garin ken dadduma pay nga indibidual a nairaman iti isyu ti Dengvaxia vaccine.
Gapu iti daytoy, nangipila ti Public Attorney’s Office iti motion for reconsideration ken kiniddaw da nga ibabawi iti desisyon ti Justice Department.
Maibasar iti 68 a pinanid a motion for reconsideration, impaganetget ti Public Attorney’s Office nga adda umdas a prima facie evidence a mangpaneknek a guilty wenno nagbasol ni Garin, Dr. Gerardo Bayugo, ken Dr. Ma Joyce Ducusin.
Pammaneknek ditoy kuna da iti pannakatay dagiti 170 nga ubbing kalpasan a natudokan d iti bakuna a Dengvaxia.
Naipaganetget pay iti mosyon a saan a mabalin a libasan dagiti akusado ti responsibilidadda iti sidong ti linteg.
Napaneknekan a kuna ti Public Attorney’s Office a nakaaramid dagiti akusado iti gross negligence, absence of foresight, care and skill.
Impaganetget ti Public Attorney’s Office nga eksperimental laeng ti pannakaitudok ti bakuna a Dengvaxia.
