Impasiguro ni 1Tahanan Party-list Representative Nathaniel “Atty. Nat” Oducado nga itandudo na ti singasing a gakat a mangital-o ken mangpapigsa ti maritime sector ti Pilipinas.
Kasaruno daitoy ti panagtaripnong ni Oducado kadagiti opisyales ti Maritime Industry Authority (MARINA) ken nadakamat da ti singasing nga ipila ti Kongresista para ti 20th Congress. Iti biang met ti MARINA ket inaltag da dagiti sumagmamano a key proposals, pakairamanan ti Philippine Ship Registry.
Babaen kadagitoy nga inisyatiba ket ad-adu pay a Filipino-owned ships ti aglayag ken mangital-o ti bandera ti pagilian kas maiyannurot ti international standards.
“This is one of the legislative priorities I am determined to push forward, because I believe that a strong maritime industry is crucial not only in boosting economic our economy through trade and transportation, but also in creating jobs, driving regional development, and strengthening national security”
Nadakamat pay iti nasao a panagtaripnong ti panagparang-ay ti shipbuilding ken ship repair (SBSR) industry, nga addaan ti nalawa a potensyal tapno i-posisyon ti Pilipinas kas maysa a “maritime innovation” ken “skilled labor hub” ditoy Asia.
Inlawlawag ti mamanday-linteg a ti pagilian ket maysa a “premier source” ti sea-based manpower nga addaan kadagiti 578,672 seafarers, kas maibasar ti datos ti MARINA idi tawen 2023. Mainayon iti dayta ket ti kaadda ti pagilian kadagiti shipyards nga agserserbi a ship repairers, boatbuilders, ken shipbreakers kadagiti nagduduma a sangladan babaen ti panagbalin a maritime country ken kas maysa nga archipelagic nation a buklen ti nasurok pito a ribo nga isla.
Saan laeng kunana a natural borders ti kabaybayan nu di ket maysa pay nga economic lifelines, strategic assets, dakkel a paset ti kultura, ken pakabigbigan.
