LA UNION – Binigbigen iti pulisya ti pasahero a napapatay babaen ti pammaltog iti uneg ti bus idiay kawatiwatan ti national highway iti Barangay Taboc, ili ti San Juan, La Union.
Naammuan ti Bombo Radyo manipud ti La Union Police Provincial Office, nabigbig ti nadakamat a biktima a ni Michael Macusi, residente ti Barangay Poblacion, ili ti Sudipen.
Maipagarup a maysa a drug personality si Macusi sigun ti pulisya.
Base met iti inisyal nga imbestigasyon, maipagarup a naggiddan a naglugan iti bus ti biktima ken ti gunman manipud idiay plaza ti ili a Balaoan ken agturong idiay syudad ti San Fernando.
Idi a makagteng ti nasao a lugan idiay Barangay Taboc ket nagpara ti suspek kasaruno iti panangpaltogna iti ulo ni Macusi.
Idi a rimmuar ti hitman manipud iti uneg ti lugan ket nakilubbon daytoy iti maysa nga agur-uray a naka-motorsiklo ken dagusda nga immadayo manipud iti crime scene.
Saan met a nalapdan dagiti nakalugan iti bus ti suspek a makarruar gapu iti buteng.
Kabayatanna, agtultuloy pay laeng iti imbestigasyon ti pulisya tapno maammuan no adda pay ti sabali a kaso a nakairamanan ti biktima, malaksid a maibagbaga a drug personality daytoy.
Saan pay laeng a makompirma dagiti otoridad iti motibo ti pammaltog. (Absalom Flores)
