BR LA UNION – Inwaragawag ti Department of Justice a plano da a kiddawen a kanselaren iti pasaporte ni Atty. Harry Roque.
Daytoy ket kagiddan dagiti isyu a sangsangwen ti sigud a presidential spokesperson ni Former President Rodrigo Duterte, a nakabalud idiay The Netherlands.
Inaramid ni Justice Secretary Jesus Crispin Remulla iti kumpirmasyon kalpasan a nasalodsod seknan iti sitwasyon ti kaso ni Atty. Harry Roque.
Ni Roque ket adda idiay pagilian a The Netherlands, ken nag-apply ti asylum.
Segun kenni Remulla, nu makanselar iti iggem a pasaporte ti sigud a presidential spokesperson, maibilang isunan nga ‘undocumented alien’.
Mangigubway daytoy ti ‘deportation’ kenni Atty. Harry Roque ket mapasubli ditoy Pilipinas gapu kadagiti sangsangwenna a kaso.
Ngem iti likudan daytoy, tinakderan ti abogado ni Roque nga awan ti maaramidan iti gobyerno tapno maipa-aresto daytoy, agsipudta nakapenpen pay laeng iti aplikasyon na nga asylum.
Kabayatanna, inaklon ni Justice Secretary Jesus Crispin Remulla a ti proseso ti asylum ket kasapolan a maileppas nga umuna sakbay a mapasubli ni Atty. Harry Roque ditoy pagilian.
Ngem impaganetget na a saanen nga agpaut ken posible a mairwar iti mabiit ti finality iti asylum application ni Atty. Roque.
Maipalagip a nangiyetnag ti arrest warrant ti Angeles City Regional Trial Court seknan iti kaso a sangsangwen ni Roque, a kas iti human trafficking gaputa maipagarop a karaman iti operasyon ti ilegal a POGO.
