Problema ita dagiti residente iti Purok 6 ken Purok 8 ti Barangay Sevilla, San Fernando City, La Union iti paset iti kalsada dagitoy a saan pay nga naipasemento.
Naamuan ti Bombo Radyo La Union manipud kenni Punong Barangay Mercita Sulmarin nga inkamangda daytoy ngem napaayda.
Maipalagip, siguden a magmagna dagiti residente iti PNR road ngem idi a nakita dagitoy a panglakaanda a pagnaan iti agpalaud nga rumuar iti kalsada ket isu daytoy iti inkamangda iti Barangay tapno mabibiitda a rumuar iti kalsada.
Innayon pay ni Sulmarin nga adda nakasagana a pangpatirimaan iti nasao a kalsada gaputa adda pondo na a maited ditoy.
Madama ita ti panangammo ti Barangay no ti nasao a paset ti kalsada no sakop iti PNR road wenno sakop iti Barangay.
Kabayatan na, malaksid iti pannakisao ti Konseho Barangay kadagiti agtagikua iti paset ti kalsada ket ikidkiddawda met nga uray dagiti residente ditoy ket umasideg tapno mas nabibiit iti agbalin a transaksyon.
