LA UNION – Naareston ni Kingdom of Jesus Christ Pastor Apollo Quiboloy ken iggemen dagiti otoridad.
Segun kenni Department of Interior and Local Government (DILG) Secretary Benhur Abalos, impatungpal dagiti otoridad ti umno a proseso.
Maika-15 ita nga aldaw sipud impatungpal ti Police Regional Office-11 iti panangidaulo ni PBGen. Nicolas Torre iti panagsapol kenni Quiboloy iti Kingdom of Jesus Christ (KOJC) compound tapno iserbi ti warrant of arrest nga impaulog ti Pasig City Reginal Trial Court.
Maipalagip nga idi June 2024 nga immuna a naiserbi ti warrants para kenni Quiboloy iti naduma-duma a KOJC properties, ngem saan da a nasarakan ti pastor.
Idi July 2024, nailatang ti reward a ₱10 million para iti makaitudo nu sadino ti paglem-lemmengan ti religious leader.
August 2024 idi mangirwar ti Court of Appeals ti freeze order para kadagiti bank accounts na ken dadduma pay a properties, lugan ken aircraft.
Idi umuna a lawas ti Setyembre 2024, imbaga ni Atty. Israelito Torreon a pimmanaw ni Quiboloy iti KOJC compound idi pay March 2024, ngem saan a sinardengan ti Philippine National Police a sapolen ti pastor.
Immabot pay a nagkali da iti naduma-duma a paset ti 30 ektarya nga arubayan ti Kingdom of Jesus Christ.
