BR LA UNION – Inaprubaran ni Presidente Ferdinand Marcos Jr., iti 2026 National Expenditure Program (NEP) a P6.793 trillion, iti singasing a pondo ti gobyerno para iti sumaruno a tawen.
Ti nasao a pondo ket mas nangat-ngato kumpara iti 2025 national budget a ₱6.326 trillion.
Inaprubaran daytoy ti Presidente iti naisayangkat a Cabinet Meeting ita nga aldaw, Hulyo 15.
Segun kenni Palace Press Officer USec. Claire Castro, iti 2026 proposed budget ket nairanta tapno maital-o iti kalidad ti edukasyon ken palag-anen ti biag dagiti umili a Pilipino.
Iti Cabinet Meeting a naisayangkat idiay Palasyo ti Malakanyang, impaganetget ti Presidente a ti national budget para iti sumaruno a tawen ket saan laeng a para iti panangidur-as ti ekonomiya ngem ketdi tapno maital-o iti biag dagiti Pilipino.
Impasiguro ti Presidente a marikna daytoy ti tunggal umili a Pilipino.
Target nga isumite ti Department of Budget and Management iti 2026 budget idiay Kongreso inton bulan ti Agosto.
