BR LA UNION – Indaulwan ni Presidente Ferdinand Marcos Jr., iti pannakaiyuswat ti P20 kada kilo a bagas idiay Zapote Public Market idiay Bacoor City, Cavite.
Nasapa a nagpila dagiti residente tapno makagatang da ti nalaka a bagas.
Segun kenni Agriculture Secretary Francisco Tiu Laurel, iti nai-rollout a P20 per kilo a bagas ket para pay laeng kadagiti benepisyaryo ti 4Ps, senior citizens, PWD ken single parents.
Inlawlawag ti sekretaryo, uray saan a taga Bacoor ket makagatang latta ti nasao a bagas.
Tunggal indibiduwal ket makagatang ti maximum a 10 a kilo.
Adda pakabuklan a 500 sako ti nalaka a bagas iti inlatang ti DA para iti rollout ti programa idiay Bacoor ita nga aldaw.
Dadduma a lugar idiay Cavite nga immuna a nangi-diaya ti nalaka a bagas, ket idiay Dasmarinas City a magatang iti mobile kadiwa a bumis-bisita iti naduma-duma a barangay tunggal Huwebes ken Biyernes.
Adda met kadiwa center idiay Naic tunggal Huwebes ken Biyernes.
Maibasar iti waragawag ti Presidente, mai-rollout ti P20 kada kilo a bagas iti intero a pagilian.
Siniguro met ti National Food Authority (NFA) nga adda umdas a pagidulinan da ti bente pesos kada kilo a bagas, a maipadanon iti naduma-duma a paset ti pagilian.
