Agtultuloy ti kablaaw manipud kadagiti nadumaduma a world leaders kalpasan a nangabak manen iti kina-Presidente ti Estado Unidos ni Donald Trump.
Maysa kadagiti kangrunaan a nangkablaaw kenni Trump ket ni Presidente Ferdinand “Bongbong” Marcos Jr nu sadino mangnamnama ti president nga addaan pay ti naing-inget a kooperasyon iti baetan ti Estados Unidos ken ti Pilipinas.
Uray ni dati a Presidente Rodrigo Duterte ket kinablaawanna met ni Trump ken inbinglayna pay dagiti retratoda a dua idi simmarungkar isuna idiay Estados Unidos.
Inawagan met ni Israeli Prime Minister Benjamin Netanyahu a historiko ti panagsubli ni Trump iti US, nga ibilbilangna a gayyem.
Iti statement manipud ti gobierno ti Hamas, nasken a denggen ni Trump iti timek dagiti Amerikano maibusor iti aniaman a pannakibiang iti gyera sadiay Gaza bayat nga impasigurado met ni Palestinian President Mahmoud Abbas a suportaranda ti aniaman a programa ni Trump.
Kabayatanna, mangnamnama ti gobierno dagiti Taliban nga addanto baro nga istorya iti relasionda iti US gapu iti panagballigi ni Trump, nu sadiay kinuna ni Foreign Ministry spokesperson Abdul Qahar Balkhi nga agtalekda unay a nasayaat ti agbalin a relasion ti dua a pagilian.
Uray ti pannakangiwat ti Chinese Ministry of Foreign Affairs a ni Mao Ning ket tinaginayonna a saan nga agbaliwbaliw ti polisia da iti US.
Patien ni Ukraine President Volodymyr Zelenskyy a ti ‘peace through strength’ a wagas ni Trump ket mangyeg iti talna idiay Ukraine bayat a mangnamnama ni Egyptian President Abdel Fattah el-Sisi kasta met ni Emir Sheikh Tamim bin Hamad Al-Thani ti Qatar ken United Kingdom Prime Minister Keir Starmer nga agtultuloy a nasayaat ti relasion dagiti pagilian da ken ti Estados Unidos iti sidong ti liderato manen ni Trump.
Uray ti United Nations, European Union ken North Atlantic Treaty Organization ket impaayda ti kablaaw kenni Trump ken sinigurado da ti pannakataginayon ti nabara a relasion.
