BR LA UNION – Aminado ni Presidente Ferdinand Marcos Jr. a makapad-padas ti pagilian iti narigat a panawen gapu iti nalawa a reporma nga ipat-patungpal ti gobyerno kasaruno ti flood control anomaly nga inbutaktak na.
Segun iti Presidente, kasapulan ti dakkel nga operasyon tapno maikkat ti “kanser” ti kurapsyon ken matarimaan ti problema iti flood control ngem saan a maliklikan ti saem nga ipaay daytoy kadagiti umili.
Nagpadispensar ni Presidente Marcos kadagiti rigat a napasaran dagiti umili, ngem impaganetgetna a nasken daytoy.
Kinunana a masapul a maibturan ti saem ken rigat tapno makaagas ken rumang-ay manen ti pagilian.
Innayon ti Chief Executive nga agtalinaed a natibker dagiti Pilipino ken alisto ti panagimbag.
Impasiguradona nga agtultuloy ti kampanya ti administrasyon kontra iti panagabuso ken entitlement, ken nakasagana nga agtrabaho “24/7” tapno maipatungpal dagiti kasapulan a panagbalbaliw.
Kabayatanna, ibilang ni Presidente Marcos Jr. a maysa a dakkel a parikut ti sangsangwen ita ti kaadwan maipapan iti peke a damag.
Ti pannakisango ti Presidente iti Malacanang Press Corps, kinunana nga adu ti kapanunotanda no kasano a malabanan daytoy ngem kasapulanna latta ti tulong iti media.
Impaganetget ti Presidente a rumbeng a maaramid daytoy babaen ti panagtitinnulong ti gobyerno ken dagiti adda iti media a kunana a pudno nga addaan ti kredibilidad a mangkontra kadagiti kunana nga awan nakaibasaranna ken saan a pudno nga impormasyon.
Kinuna ti Presidente nga idi damo, kasla nakakatkatawa dagiti peke a damag, ngem ita mabalinen a maibilang a MAKAPADAKES wenno makadadael unay.
Aminado ti Chief Executive a kasapulan ti gobyerno ti suporta ken tulong ti media tapno mailawlawag kadagiti tattao no anya ti patyen da ken no anya ti saan a patyen.
