BR LA UNION – Nainget a pinaglibakan ti Malakanyang iti alegayon ni sigud a President Rodrigo Duterte a tinakaw ken inlako ni President Ferdinand Marcos Jr. iti gold reserves ti pagilian.
Iti press briefing idiay Malakanyang, impaganetget ni Presidential Communications Office USec ken Palace Press Officer Atty Claire Castro, iti Bangko Sentral ng Pilipinas iti kakaisuna a mangay-aywan ken mangiman-manehar iti gold reserves ti Pilipinas, ken kaatnuman saan a pakibiangan daytoy ti Presidente.
Imbaga pay ni Castro nga arigna awan ti mangbal-balakad kenni sigud a presidente Duterte a regular activities ti BSP iti panaglako ti gold reserves tapno masungbatan iti exchange requirement ti Pilipinas.
Kinuna na pay a maibasar iti waragawag ti BSP, paset ti mandato da a saan a mangiggem ti aglab-labes a balitok, isunga adda dagiti gundaway a nasken nga ilako daytoy nu nangato iti presyo.
Kinapudno na, segun iti opisyal nga idi 2024, dimmanon iti 106.3 billion USD ti gross international reserved (GIR) ti Pilipinas, manipud iti PhP103.8 billion USD idi 2023.
Innayon ni Castro, nga October 2024 pay a nasungbatan iti nasao nga alegasyon ti sigud a presidente, isunga saanna a maawatan nu apay a sangka-dullit daytoy nga ibaga ni Duterte.
Mamati ni Usec Castro, a baro a joke wenno campaign promise manen ti sigud a presidente iti nasao a waragawag.
Siniguro ni Castro a saan nga itulok ti gobyerno nga agtultuloy ti panagiwaras iti biddut nga impormasyon iti kampo ni Duterte isunga seryoso a sungbatan daytoy ti Malakayang tapno maidanon iti publiko nu anya ti umno ken pudno nga impormasyon.
