BR LA UNION – Balligi a naisalakan dagiti kameng ti Coast Guard Clearing Out Post (COP) Bauang, kakadwa dagiti Deployable Response Group (DRG), Special Operations Unit-North Western Luzon, Coast Guard Medical Clinic-North Western Luzon, ken dagiti dadduma pay a volunteers ti malmalmes a lalaki idiay Brgy. Taberna, Bauang, La Union.
Kabayatan ti Baywatch Patrol operations iti baybay ti nasao a barangay kas paset ti Semana Santa ken SUMVAC 2025 activities, nakita dagiti personnel manipud PCG team ti maysa a beachgoer nga agkidkiddaw ti tulong, agarop 20 a metro manipud iti igid ti baybay, ket dagus da a nagresponde ken naisalbar da iti biktima.
Dagus a naipaayan ti medical attention babaen kadagiti medical personnel ti Coast Guard.
Nabigbig ti naisalakan a ni Jay Mendoza, 23-anyos, residente ti Baguio City.
Inlawlawag ni Mendoza a ginuyod isuna ti napigsa a dalluyon iti baybay bayat ti panaglangoy na ket gestay a nalmes.
Iti agdama, addan iti natalged a kondisyon ni Mendoza iti sidong ti pamilya na.
Kabayatanna, agtultuloy iti ar-aramiden ti PCG a Baywatch Patrol Operations iti paset ti kabaybayan a sakop ti La Union .
