LA UNION – Umaboten iti P9.81 billion ti napagtipon a kantidad iti perdisyon nga imbati ti Severe Tropical Storm (STS) ‘Kristine’ ken Super Typhoon (ST) ‘Leon’ iti sektor ti panagtalon.
Maibasar iti kauddian a report ti Dept. of Agriculture – Disaster Risk Reduction and Management Operations Center, naapektaran dagiti dua a bagyo iti rehiyon ti Cordillera Administrative Region (CAR), Ilocos Region, Cagayan Valley, Central Luzon, CALABARZON, MIMAROPA, Bicol Region, Western, Central and Eastern Visayas, Zamboanga Peninsula, SOCCSKSARGEN ken Caraga Region.
Umabot metten iti 233,923 a mannalon ken mangngalap iti nadetermina a naapektaran.
Iti production loss, umaboten iti 380,704 metriko tonelada nga agricultural products ti nadadael manipud iti 183,877 nga ektarya iti kataltalunan.
Iti kapagayan iti kangrunaan a naapektaran iti dua a nagsaruno a bagyo ket mapatta-patta nga umabot iti P5.89 billion iti pakabuklan a perdisyon.
Kaibatugan daytoy ti 1.60% a pannakalugi iti annual target production ti pagilian.
Iti agdama, agtultuloy iti isay-sayangkat nga assessment, isunga adda pay pagbaliwan iti nasao a datos .
