Dumanonen iti P129.39 milion ti perdisyon iti sektor ti panagtalon gapu iti panagbettak ti Mount Kanlaon, segun iti Department of Agriculture (DA).
Naapektaran daytoy ti panagbiag ti agdagup iti 1,431 a mannalon manipud iti Negros Island ken nakadadaelan ti nasurok a 580 nga ektaria a talon.
Dakkel a porsiento ti pannakadadael ket dagiti high value crops sector a nakairekord iti P124.93 million. Katupag daytoy ti 5,311 a tonelada nga agricultural products.
Sinaruno daytoy ti industria ti bigas a mapattapatta a dumanon iti nasurok tallo a milion a danyos.
Ti nabati ket nabingbingayen kadagiti dadduma pay nga industria kas iti livestock, manok, ken industria ti mais.
Adda met iti naka-standby a P1 billion quick response fund ti DA ken mabalin nga usaren para iti rehabilitation ken recovery dagiti lugar a naapektaran iti agtultuloy a panagbettak ti nasao a bulkan.
