Makipinnatangken dagiti residente tapno kontraen iti panangipatakder ti mini-hydroelectric poser plant ken dam iti Barangay Mamat-ing idiay ili ti Naguilian, La Union.
Iti pannakiuman ti Bombo Radyo kenni Lando Argales, residente iti nasao nga ili ken vice-president ti La Union Peace and Justice Advocates, kinuna na nga adu kadgaiti kakailyan na ti kontra iti nasao a proyekto ngem mabutengda nga agparang tapno mangipeksa ti arungaing iti liderato ti Mini-Hydro electric Corporation ken lokal a gobierno ti Naguilian.
Mangaramid da me ti petisyon tapno saan nga matuloy ti panangipatakder iti nasao a proyekto gaput adu nga lugar umano ti mabalin a malayos wenno maisakmag ti peggad inkaso nga adda bagyo.
Immuna ditoy, idi kalman nangisayangkat ti tignay protesta dagiti residente iti nasao nga lugar ken saan a natuloy iti nakatuding a kuma ket ground breaking ceremony.
Iti agdama, al-alaen pay laeng ti Bombo Radyo news team ti binneg ti Mini-Hydro electric Corporation ken ti Naguilian Municipal Government maipapan iti nasao nga isyu.
Naamuan a dumanon iti P1,506,577,675.00 ti nakalatang a pondo para iti panangipatakder ti nasao a proyekto.
