Kampante ni Philippine Army Commanding General Lieutenant General Roy Galido iti panagrang-ay ti programa a modernisasion ti Army inton sumaruno a tawen.
Kagiddan ti panagbalbaliw ti tawen, kinuna ti heneral a sumagmamano a proyekto ti nakalinya para inton sumaruno a tawen a paset amin ti programa ti modernisasion.
Kinunana a dagitoy ket paset ti tarigagay ti gobierno a mangpapigsa pay iti kabaelan ti Katihan Army, banag a naaramid metten ita a tawen.
Intampok pay ni Galido dagiti nagapuanan ti Philippine Army (PA) idi 2024 kas iti panaggatang kadagiti moderno a defense assets babaen ti Armed Forces of the Philippines (AFP) Revised Modernization Program nga iti agdama ket addan iti maikatlo ken maudi a paset na.
Segun iti 3-Star general, sigurado a palawaen ti baro nga asset ti militar ken depensa ti kabaelan ti Philippine Army a mangidepensa iti national sovereignty ken mangsungbat agpadpada kadagiti tradisional ken saan a tradisional a pangta a sangsanguen ti pagilian.
Nagyaman pay ti heneral kadagiti soldado ti pagilian nga agtultuloy nga agserbi ken agsakripisio tapno matungpalda ti sinapataan a pagrebbenganda.
