BR LA UNION – Nailista manen ita nga aldaw ti Martes Santo, Marso 31, 2026 ti kababaan a balor ti piso iti pakasaritaan kalpasan a nagrikep ti trading iti P60.74 kada US dollar, mas nababbaba manen nu ikumpara idi kalman a nagrikep iti P60.69.
Immabot pay iti intraday low a P60.84 sakbay a nagrikep ti exchange rate, a mangipak-pakita ti agtultuloy a pressure iti local currency.
Iti pakabuklan, bimmaba iti aganay P1.90 ti piso manipud Disyembre 2025 nga idi ti sukat ket P58.79 pay laeng.
Segun kadagiti analyst, ti agtultuloy a tensyon idiay Middle East ken panagngato ti presyo ti langis iti kangrunaan a makagapo ti panagkapoy ti piso, bayat nga agtaltalinaed a natibker ti demand para iti US dollar kas safe-haven currency.
Namnamaen a ngumato iti presyo dagiti gagatangen ken imported goods, ngem agnumar met iti pamilya dagiti OFWs gapu iti nangato a balor ti dollar remittance.
Ita a lawas, agbalor ti $87 kada bariles iti Brent crude, a nangpakaru iti inflation ken nangpapigsa ti demand para iti dolyar.
Kagiddan daytoy, nagsuwek ti 2.5% iti Philippine Stock Exchange Index (PSEi) idi Marso 30, 2026, indikasyon ti panagdanag dagiti investors.
Siniguro met ti Bangko Sentral ng Pilipinas nga agtultuloy ti panang-bantay da iti sitwasyon ken nakatuding da nga agtaripnong da inton Abril 23 tapno talantanen iti posible a monetary policy response.
