Pinasingkedan ni PNP spokesperson Police Brigadier General Jean Fajardo a pito nga pulis ti adda itan iti kustodiya ti Leyte Provincial Police Office.
Maikonsodera dagitoy a pito kas persons of interest iti gandat a pammapatay kenni mayoral candidate Kerwin Espinosa idiay Albuera, Leyte.
Ti mapapati a gunman ket nagtaray agturong iti compound nga asideg iti gym a nangpaltogan na kenni Espinosa.
Idi nagresponde dagiti kameng ti kapulisan, naklaat da idinto a natakuatan da iti gym dagiti lallaki a nagpaam-ammo kas Ormoc City Police – dua nga opisyales ken lima a non-commissioned officers.
Segun kenni Fajardo, nakaskasdaaw ken kwestyonable ti kaadda dagiti kameng ti Ormoc City police personnel iti nasao a lugar agsipud ta nakadestino da kuma idiay Ormoc City Police Office.
Kabayatanna, maysa a Montero SUV nga inusar dagiti nagpabigbig nga Ormoc policemen iti nasukimat nu sadino ket natakuatan dagiti innem nga M-16 assault rifles, tallo a 9mm pistols, dua nga .45-caliber pistols – ken amin ket kinumpiskar dagiti nagresponde a kameng ti PNP mobile force.
Ni Kerwin Espinosa ket maysa a self-confessed drug lord a nangdakamat met kenni sigud a Senadora Leila de Lima nga adda pakainaigan na iti drug trade ket nagkuna a napuwersa laeng isuna nga agsao babaen kenni sigud a PNP Chief Ronald ‘Bato’ dela Rosa.
Agdama isuna ng agkankandidato kina-Mayor iti Albuera, Leyte.
