BR LA UNION – Maysa a handwritten letter manipud kenni Ramil Madriaga, ti self-confessed “bagman” ni Bise Presidente Sara Duterte, iti nakailanadan a maipagarop nga adda plano ni sigud a Presidente Rodrigo Duterte a mangikkat kenni Presidente Ferdinand Marcos Jr. ken isukat na ni VP Sara idi tawen 2025.
Iti nasao a surat a napetsaan ti Abril 11, 2026 nailadawan dagiti mapapati a panagtataripnong idi Nobyembre 2021 a napagsasaritaan ti isyu ti panangipalubos a tumaray ni Marcos Jr. kas presidente ngem ikkaten da met laeng iti puwesto.
Nailadawan pay iti nasao a surat nga adda plano a sukatan ni Marcos “by any means,” ket ni Sara ti posible nga isaruno a patugawen kas Presidente ken mabalin pay a tumaray wenno agkandidato iti 2028 presidential elections.
Nailadawan pay iti dokumento ti maipagarop a senario ti riribok, a pakairamanan dagiti mass resignation, nasaknap a protesta, panangraut idiay Malacañang, ken posible a kudeta a pakairamanan dagiti mobilisado a grupo ken indibidual.
Nadakamat pay a ni Madriaga ket mapagarop a nabilin nga ag-recruit kadagiti grupo a pakairamanan dagiti kriminal ken sindikato tapno agpataud ti riribok a makatulong tapno nalak-laka iti aramiden a panangbaliw ti gobierno.
Iti sabali a bangir, iti House impeachment inquiry hearing a nakatuding ita nga aldaw (Abril 14), namnamaen a pagsalodsodan dagiti mammanday linteg ni Madriaga maipapan kadagiti waragawag na.
Impaganetget ni Bicol Saro Rep. Terry Ridon a rumbeng nga agtalinaed a nakasentro ti imbestigasyon kadagiti alegasyon a mainaig iti impeachment ken saan a kadagiti banag a saan a direkta a mainaig ti daytoy.
Nakalukat ti Bombo Radyo iti kampo ni VP Sara tapno sungbatan dagiti akusasyon ti maipagarop a sigud a bagman.
