BR LA UNION – Nasurok P69 million a gatad ti marijuana iti dinadael ti Philippine National Police (PNP) iti nagsasaruno nga operasyon idiay Benguet.
Iti las-ud ti maysa a lawas, 24 nga operasyon ti naisayangkat manipud Marso 16–22, 2026.
Nakumpiskar ti 72,900 a fully grown marijuana plants ken 420 a seedlings.
Karaman pay ti 454 a kilo a nagango a bulong ti marijuana, puon, ken fruiting tops.
Dagus a pinuoran dagiti otoridad tapno saanen a mausar iti anyaman a kinadakes.
Segun kenni PNP Chief Gen. Jose Melencio Nartatez Jr., agtultuloy ti kampanya kontra droga ken naka-focus da iti pagtataudan ti illegal a droga ken dagiti dadakkel a personalidad nga adda iti likudan daytoy.
Impaganetgetna a saan nga agsardeng ti pulisya a mangdadael kadagiti plantasyon ti marijuana.
Tarigagay ti operasyon a puteden ti suplay ti illegal a droga ken masalakniban ti komunidad.
